Vahaolana amin’ny fitohanan’ny fiara

Efa vonona ireo « Feux tricolores » azo baikoana amin’ny Finday

Fifamoivoizana
Zoma 25 Oktobra 2024

Tsy resaka hoe nafarana dia mbola eny ambony sambo fa efa niomana isika ary izay notenenina

dia tanterahina hoy i Tahina Razafinjoelina androany. Tonga ireo jiro miloko telo na « feux tricolores » apetraka amin’ireo kihon-dalana eto Antananarivo renivohitra mba handaminana ny fifamoivoizan’ny fiara. Anisan’ny vahaolana hampihenana ny amboteiazy na tohamboivoy izy io. Tsy miankina amin’ny Jirama fa mandeha amin’ny herin’ny masoandro ary misy solosaina kely ao anatiny. Afa mibaiko ny jiro mirehitra amin’ny « feux tricolores » ireo polisy mandamina ny fifamoivoizana amin’ny alalan’ny « application » ao anatin’ny finday, izay mifandray avy hatrany amin’ilay solosaina kely ao amin’ireo jiro miloko telo. Rehefa mena, mijanona ny fiara, maitso afaka mandeha tsara, mavo mandeha tsimoramora. Singa iray ao anatin’ireo vahaolana amin’ny tohamboivoy ihany ny « feux tricolores » fa mbola azo atao tsara ihany koa ny mampiasa ireo « camera de surveillance » sy ny « drone » mba hitsirihana hoe aiza no mitohana, aiza no malalaka, misy inona mitranga ? Tsara marihina fa vola amina am-polony miliara ariary isam-bolana no very vokatry ny amboteiazy eto Antananarivo renivohitra sy ny manodidina.Tsy lazaina intsony ny fotoana very sy ny fahasorenana.
RTT