Fifamoivoizana

Tontolon’ny fitaterana Nodimandry ny filohan’ny UCTU

Fifamoivoizana
Sabotsy 16 Septambra 2017

Nodimandry omaly zoma 15 septambra Andriamatoa Bernardin Andriambinintsolomora filohan’ny UCTU na ny “Union des cooperatives de transport urbain”.

Nanaitra ny maro tokoa ny fandrenesana izao fahalasanany tampoka izao. Ny alakamisy 14 septambra teo mantsy dia mbola tazana salama tsara izy niatrika ny valandresaka ho an’ny mpanao gazety niaraka tamin’ny lehiben’ny sendikan’ny Taxi ville sy ny mpitatitra. Na dia efa zokinjokiny ihany aza ny prezida Bernardin dia mbola tena mavitrika amin’ny asany ary maro ny mpanao gazety no mahafantatra tsara azy. Mahitsy fitenenana izy kanefa be hanihany ihany koa. Ny aina moa tsy mifametra ary tsy misy mahalala izay havoaky ny ampitso. Nanaitra ihany izao fahalasanany tampoka izao, indrindra fa ao anatin’ny vanim-potoana mafampana ny sehatry ny fitaterana eto an-drenivohitra ary anisan’ireo re sy tazana matetika amin’io tontolo io izy. Anisan’ny delegasionina niondrana tany Chine raha nisy ny tetikasa amin’ireo fiara fitateram-bahoaka moderna i Bernardin Andriambinintsolomora ary niady mafy hatrany ny amin’ny fiarovana ny zon’ny mpitatitra sady nanome toky ny fiezahan’izy ireo hanaja ny bokin’andraikitra sy ny kalitaon’ny asa atolotra ny mpanjifa. Mety fanombohana ihany ny an’i tompokolahy fa andrasana ny fanohizan’ireo izay mety handimby azy. Mirary fiononana sy mankahery ny fianakaviany ny Gazety Tia Tanindrazana