Fifamoivoizana

Toby fiantsonana Fasan’ny Karana Tafapetraka ny tonelina fidiovana

Fifamoivoizana
Alatsinainy 28 Septambra 2020

Tafapetraka eny anivon’ny tobim-piantsonan’ny Fasan’ny Karana ny sabotsy teo ny « tunnel désinfectant » na tonelina fidiovana sy ireo afisy ahitana ny saran-dalana ara-dalàna ho an’ireo zotra rehetra miasa ao aminy,

raha ny fampitam-baovao teo anivon’ny minisiteran’ny fitaterana omaly. Hampizotra antsakany sy andavany ny fandraisana ireo mpandeha, ho fanajana ireo fepetra ara-pahasalamana samihafa entina handresena ny Covid 19 no tanjona, hoy ny fanazavana. Tonga nijery ny fandaminana samihafa teny an-toerana ny avy amin’ny Ministeran’ny Fitaterana, ny Fizahantany ary ny Famantarana ny toetr’andro, notarihin’ny Sekretera Jeneraliny. Ho fitandroana ireo fitaovana samihafa, indrindra fa ny tonelina fidiovana dia napetraka ny fifanarahana ara-taratasy teo amin’ny ministera sy ny mpitantana ny tobim-piantsonana eny amin’ny Fasan’ny Karana. Isan’ireo tobim-piantsonana nametrahana « tunnel désinfectant » ihany koa ny eny amin’ny MAKI eny Andohatapenaka, hoy hatrany ny fanazavana.

J. Mirija