Fifamoivoizana

Toby fiantsonana Ampasampito Nitombo 5000 Ar ny saran-dàlana

Fifamoivoizana
Talata 23 Novambra 2021

Efa nilaza sy nanamafy ny voalaza tamin’ny 10 novambra ny avy amin’ny Minisiteran’ny fitaterana sy ireo mpiara-miombon’antoka aminy,

ary ireo solontenan’ny mpitatitra ny faran’ny herinandro teo, fa tsy misy fiakarany izany ny saran-dalàna manomboka ny 22 novambra, saingy tsy voahaja izany. Omaly, nampiakatra ihany ny mpitatitra tetsy amin’ny Toby fiantsonana Ampasampito. Niakatra ho 20.000Ar ny saran-dàlana mihazo an’i Vatomandry raha 15.000Ar izany teo aloha. Lasa 25.000 Ar ny mihazo an’ Ilaka Est raha 20.000 Ar izany teo aloha, 30.000Ar raha 25.000 Ar izany teo aloha. Nilaza ireo mpitatitra fa hitokona izy ireo raha toa ka midina indray io saran-dalana io satria maty antoka izy ireo. Nisy mihitsy ny karazana fampitandremana nataon’ny manampahefana ny herinandro teo, fa tsy azo atao ny mampiakatra saran-dàlana fa ny komity manokana izay hotendrena amin’ny alalan’ny didim-panjakana ihany no manapaka izany, saingy tsy te hiraharaha an’izay izany ireto mpitatitra ireto. Aiza ho aiza ny fipetraka sy fankatoavana ny fahefam-panjakana amin’izany? Ara-drariny ve ny fampiakarana amina elanelany 5000Ar be izao? Rahoviana marina vao ho tafatsangana ilay komity handinika ny toe-draharaha ?
Toky R