Fifamoivoizana

TAXI eto an-drenivohitra Tsy hampiditra fiara vaovao ny kaominina

Fifamoivoizana
Alatsinainy 14 Septambra 2020

Saika mivarotra ny taxi-any avokoa ireo tompona fiara mampiasa izany eto an-drenivohitra amin’izao fotoana izao no sady manao varo-boba.

Raha araka ny tsaho niparitaka tao anaty tambajotran-tserasera facebook mantsy dia hampiditra fiara vaovao maro sy mitovy ny kaominina Antananarivo renivohitra mba hanoloana azy ireny. Nanitsy io vaovao niely io sy nilaza ny tena marina araka izany ny solontena avy eo anivon’ny FTAR ka nambarany tamin’izany fa tsy manam-pikasana ny hanao izany mihitsy ny kaominina. Miantso ireo mpampiasa fiara karetsaka eto an-drenivohitra araka izany ny FTAR mba tsy ho taitaitra. Anisan’ny tena imasoan’izy ireo ankehitriny ny fanovana ho nomerika ny licence izay nomarihiny ihany fa tsy handoavam-bola na Ar aza. Toraka izany koa ny ady amin’ny taxi moto sy ny bisikileta izay manimba ny asan’izy ireo. Ho an’ireo manana taxi mbola tsy misoratra amin’ny anarana kosa anefa dia tokony hanao ny mutation faran’izay haingana izy ireny hahazoany ny tombontsoa rehetra. Miisa 4.727 moa ireo taxi miasa eto an-drenivohitra ankehitriny.

Pati