Fifamoivoizana

Taksibrosy nandona taksibe Olona roa naratra mafy

Fifamoivoizana
Alakamisy 03 Oktobra 2019

Nisehoana loza mahatsiravina teny Andranomena omaly maraina. Taksibrosy iray mampitohy an’Antananarivo amin’ny faritra na irony antsoina hoe nasionaly irony no naka sisiny loatra ka nandona taksibe

iray teny an-toerana avy any aoriana, mitatitra mpandeha hankaty an-drenivohitra, nandray olona teo amin’ny tobim-piantsonan’ny taksibe teo Andranomena. Vehivavy iray manodidina ny 25 taona no nofaohany ka niankapoka raha iny niakatra ilay taksibe handray azy iny, niampy tovolahy iray izay nipitika ary voalaza fa mbola herotrerony ihany koa. Torana tsy nahatsiaro tena izy noho ny dona mafy nahazo azy sady nihosin-dra ihany koa. Rovitra ihany koa ilay zipo nanaovany. Raha ny fanazavan’ireo mponina eny Andranomena nanatri-maso moa dia nandeha mafy ilay taksibrosy ao amin’ny zotra nasionaly, antony nahatonga ny loza sady efa reraky ny torimaso ihany koa ilay mpamily. Nitsoaka moa ity farany nandritra ny fotoana nitrangan’ny loza noho ny tahony ny fitsaram-bahoaka mety nihatra taminy. Nentina avy hatrany teny amin’ny hôpitaly manara-penitra ireo naratra. Hatramin’ny fotoana nanoratanay moa dia mbola mampanahy ny fahasalaman’ilay vehivavy naratra.

Pati