Fifamoivoizana

Partagé sur :
• facebook

Olona roa no indray namoy ny ainy vokatry ny lozam-pifamoivoizana mahatsiravina teny amin’ny By Pass, tsy lavitry ny “Rond point” eo Ambohimanambola omaly tolakandro tokony ho tamin’ny 3 ora latsaka kely teo ho eo.

 Fiara sprinter taksibe ao anatin’ny zotra 163 no nifanehitra tamin’ny fiara kely iray miloko mena marika Seat. Mafy dia mafy ny fifandonana, ka samy potika ny fiara saingy tena rotika tanteraka kosa ilay fiara madinika, ka potsitra sy maty tao ireo mpivady tao anatiny. Ilay vehivavy maty teo noho eo, raha mbola nisy aina kely kosa ilay lehilahy teo am-pamonjena, saingy tsy tana izany noho ny ratra, raha ny fanazavana. Samy nentina teny amin’ny Hopitaly HJRA Ampefiloha izy mivady ireo taorian’ny loza, fa ho an’ilay taksibe kosa dia tsy latsaky ny 8koa no naratra, fa tsy nisy ny aina nafoy.  Tsy fantatra mazava izay tena anton’ny loza, fa ny azo antoka aloha, dia nisy ny fandehanana mafy dia mafy tao raha tarafina amin’ny fahapotehana sy ny mety ho hamafin’ny fifandonana. Raha ny siosion-dresaka dia nisy moto nanapaka tampoka ihany koa tao anatin’ity loza ity ka fialana izany no nampidofotra ireo fiara, saingy tsy nisy ny tena afaka manamarina izany, ka dia andrasana ny valin’ny fanadihadiana manam-pahefana. Tena sesilany ny loza mahatsiravina nahafatesana olona tato anatin’ny 3 andro satria 28 no maty navadiky ny traktera tany akaikin’i Betsiaka akaikin’Ambilobe (RN5A) ny alarobia teo, fiara tsy mataho-dàlana iray lasa tany anaty hantsana tany Ankazobe afak’omaly, ka nirehitra ary maty sy may kila forehitra tao ny mpamily, ary iny omaly iny indray ny hafa. Mety nisy hafa koa tany ho any, fa ireny no fantatra.

Toky R

Tia Tanindrazana

Samia mijoro ho an'i Gasikara.