Fifamoivoizana

Taksibe nitrifana teny Behoririka Fiara 1 simba, olona 3 naratra

Fifamoivoizana
Alarobia 02 Aogositra 2017

Omaly maraina tokony ho tamin’ny 7 ora no nitrangana lozam-pifamoivoizana saika nanahirana tetsy Behoririka.

Taksibe laharana 144 izay mampitohy an’Analakely sy Mahazo no tapaka isatra ary dia nijotso nifaoka ireo fiara rehetra nifanehitra taminy. Fiarakaretsaka Super 5 iray moa no tena hita ho voa mafy tao anatin’ny fifandonana nialohan’ny nifatraran’ity taksibe ity tamina fiara tsy mataho-dalana iray ka naha voadona mpandalo miisa 3. Araka ny vaovao voaray farany moa dia tsy nisy ny aina nafoy fa naratra avokoa ireo olona 3 voadona.Tsy vao izao fa matetika no misy loza ateraky ny taksibe, ka fahendrena kosa angamba ho an’ny mpitantana ny tanàna sy ny mpitondra fanjakana ny manara-maso akaiky azy ireny sy hentitra any anaty “visite technique” ; sa ve andrasana hisy faty olona maro be indray vao handray fepetra ?

J. Mirija