Fifamoivoizana

Taksi sy Taksibe eto an-drenivohitra Maro ireo efa tena ratsy sady tsy manara-dalàna

Fifamoivoizana
Alatsinainy 19 Martsa 2018

Betsaka amin’ireo fiarakaretsaka sy taksibe miasa eto an-drenivohitra sy ny manodidina amin’izao no efa tena ratsy.

Ankoatra ny fampidirana solika izay tsy mandeha amin’ny laoniny intsony dia misy ireo tsy misy varavarankely intsony ka mitifitra be ny orana rehefa fotoam-pahavaratra tahaka izao sady mbola hazokely ihany koa no hampiasainy hatao seza amin’ny afovoany, indrindra ho an’ny taksibe. Ho an’ny sasany indray dia efa zara raha misy hipetrahana ny seza ao anatiny sady mbola maranitra mandratra ihany koa ny vy manodidina azy ka tsy vitsy ireo mitondra takaitra. Efa toy ny mahazatra ny tompon’andraikitra avokoa anefa ireny rehetra ireny amin’ny ankapobeny ka tsy misy taitra intsony. Ho an’ny kaoperativa sasany dia mety aminy ilay fiara rehefa mahaloa ny vola takiany aminy isan’andro. Ho an’ny mpitandro ny filaminana indray dia ireo fiara tsara kojakoja indray aza no tena sakanany sy hitsofany kirioka eny an-dalana raha tsy voasava mihitsy ireny fiara tena ratsy ireny. Ankoatra izay, tsy manaja mpandeha sy mihodina an-dalana ihany izy ireny, antony mampahazo vahana tanteraka ny gaborakaka eto amintsika. Andrasana, araka izany, ny fandraisan’andraikitry ny tsirairay manoloana ireny fiarakaretsaka sy taksibe efa tena ratsy ireny ho fiarovana ny aim-bahoaka.

Pati