Sokajina fitaterana “service plus”

Nisafidy tsy ampiakatra saran-dalana na ratsy aza ny lalana

Fifamoivoizana
Zoma 05 Janoary 2024

Iaraha-mahita ankehitriny ny haratsian’ny lalana eto Madagasikara, hoy ny

tomponandraikitry ny fitaterana amin’ny tobim-piantsonam-piara fitaterana iray etsy Ankadimbahoaka, Eddy Ramaroson. Adin’ny 3 no vita i Antsirabe, hoy izy, taloha fa izao tsy vita raha tsy adin’ny 5 sasany. Adin’ny 4 sasany raha mandeha mafy. Soa fa tsapan’ny mpandeha fa tsy fanahiniana ny fahataran’ilay diany. Sarotiny izahay amin’ny fanaraha-maso ny fahasalaman’ireo fiara fa efa mijery an’izay koa anefa ny mpitandro filaminana. Rehefa betsaka tahaka ny hita amin’ny vanin’andro fety toy izao ny olona dia ohatran’ny hoe faly ny mpitatitra fa na eo aza nefa izany dia tsy mampiakatra saran-dalana izahay ary voafetra ho 16 ihany ny isan’ny olona anaty fiara. Antananarivo-Ambatolampy, 8000 Ariary. Antananarivo-Ambohimandroso, 9000 Ariary ary Antananarivo-Antsirabe, 20.000 Ariary. Izay no sokajiana anatin’ny antsoina hoe fitaterana “service plus”. Hajaina ny kalitao. Tsy mampiakatra saran-dalana na avy orana sy ratsy aza ny lalana ary na inona na inona toe-java-misy, raha mbola azo atao, hoy hatrany ny tenany.
J. Mirija