Fifamoivoizana

Soanierana Maty tsy tra-drano ilay mpitondra scooter

Fifamoivoizana
Zoma 10 Jolay 2020

Niala lavaka teny am-pandehanana, nitrosona dia lasa tao ambany kamiaon’ny Jirama niray zotra taminy.

Tsy azo nidovirana ny loza. Maty tsy tra-drano ilay mpitondra scooter. Teo Soanierana, amin’ny lalam-pirenena faha-7 manaraka ny Boulevard Ratsimandrava no nitranga ny loza, omaly maraina. Tonga teny an-toerana ny Polisy misahana ny lozam-pifamoivoizana nanamarina ny loza taloha ny nitondra ny razana namonjy ny tranompaty. Raha araka ny fantatra dia « livreur » ity tra-doza teny Soanierana ity.Nisesy tato ho ato ny lozam-pifamoivoizana amin’ny moto teto an-drenivohitra, manararaotra ny lalana tsara vao nasiam-panamboarana tamin’ny fitondrana Hery Rajaonarimampianina sy ny fitantanan’ny Ben’ny tanàna Lalao Ravalomanana. Vokatry ny fandehanana mafy no fototry ny ankamaroan’ny loza, eo koa ny tsy fanajana ny lalàna mifehy ny fifamoivoizana ; manararaotra ihany koa ireo mpitondra moto amin’izao fahavitsian’ny fiara mandeha amin’ny arabe anatin’ny fahamehana ara-pahasalamana ampiharana ny fepetra fihibohana tsy hianahan’ny covid-19 izao.

Jean D.