Fifamoivoizana

RN 1 Anosizato - Fenoarivo Hitarina ny arabe

Fifamoivoizana
Talata 19 Desambra 2017

Tsy maintsy hitarina ny lalam-pirenena voalohany manomboka etsy amin’ny tetezan’Anosizato ka hatreny amin’ny kaominina Fenoarivo ialana amin’ny fitohanana lavareny mampijaly ny mpandeha isan’andro.

Efa roa volana izao no nametraka tsatòka (piquet) mamantatra ny toerana tsy azo hanorenana eny amin’iny faritra iny ny minisiteran’ny fanajariana ny tany hahafahan’ny olona miomana, hoy Andriamanohisoa Gerard, tale jeneraly iray eo anivon’ny minisiteran’ny fanajariana ny tany, omaly. Tafiditra ao anatin’ilay 15 metatra natokana ho an’ny arabe izy io ka tsy maintsy alana amin’ny toerany avokoa. Raha misy ireo milaza fa nahazoany taratasy fahazoan-dalana avy amin’ny kaominina ny asa fanorenana nataony dia tompon’andraikitra feno ilay Ben’ny tanàna. Nomarihiny fa tsy fantatra mazava ny fotoana hanombohan’ny asa. Ankoatra ity asa fanitarana ny lalam-pirenena voalohany ity dia fantatra ihany koa fa hisy ny fananganana tetezana lehibe eny Avarabohitra Itaosy hampitohy azy amin’Anosipatrana, ialana amin’ny fitohanana hatrany.

Pati