Fifamoivoizana

Partagé sur :
• facebook

Omaly alakamisy no nanao fanambarana niraisana tetsy Ambodivona ireo fikambanan’ny koperativan’ny fitaterana mivondrona ao amin’ny zotra an-drenivohitra sy ny manodidina (UCTU, UCTS) sy ny mpampanofa fiara ary ireo mpiaro ny zon’ny mpanjifa MCI sy RNDC.

 Nisy ny ezaka rehetra natao, tahaka ny fihaonana tamin’ny tompon’andraikitra isan’ambaratongany hatrany amin’ny minisitra nanomezana tolo-kevitra. Tsy nisy anefa hatreto ny vokatra sy ny vahaolana. Nilaza hatrany ny fanjakana fa efa vidiny marina io (verité de prix) ka hampihatra ny tokony ho saran’ny azy ihany koa ny mpitatitra. Matoa atao ny fitakiana dia azo atao tsara ny mampihena io vidin-tsolika io, hoy ireo mpiaro ny zon’ny mpanjifa. Ankoatra izay dia nangataka koa ireto farany ny tokony hampiakarana ny karama raisina ambany indrindra (SMIG) ho 500 000 Ar ho an’ny mpiasam-panjakana ary 300 000 Ar ho an’ny tsy miankina mba hanarahana izao fidangan’ny vidin-tsolika izao. Tetsy an-daniny, nampiaka-peo ny UCTU sy ny  UCTS fa miteraka safotofoto sy mampiakatra ny kolikoly ary mampirongatra ny loza any amin’ny faritra ny  naoty nataon’ny Antokon-draharaha misahana ny fitaterana an-tanety (ATT). Voalaza ao mantsy ny fepetra tsy maintsy arahin’ny zotra an-drenivohitra sy ny manodidina rehefa mandeha mihoatra ny 100Km. Ao, ohatra, ny tsy maintsy anaovana contre visite raha fiara mihoatra ny 20 taona kanefa ny any amin’ny faritany tsy misy an’izany. Ekena ny fiarovana ny ain’ny olona fa mila ampiharina hatrany amin’ny faritany, hoy izy ireo. Amin’izao fotoana fialantsasatra izao dia tsy araky  ny amin’ny faritany intsony ny fitaterana fa tsy maintsy misy ny fiara avy eto Antananarivo hofaina mankany kanefa misy ny sakantsankana amin’io naoty nivoaka io. Handray fanapahan-kevitra izy ireo ary hanatsahatra ny asany indray raha tsy hisy ny vahaolana raisin’ny tompon’andraikitra.

Tsirinasolo

Tia Tanindrazana

Samia mijoro ho an'i Gasikara.