Fifamoivoizana

Môtô nifatratra tany an-kady Avotra izy mivady, maty ilay zazakely

Fifamoivoizana
Talata 02 Aprily 2019

Nisehoana loza mahatsiravina teny Anjomakely Bongatsara ny alahady hariva lasa teo tokony ho tamin’ny 7 ora.

Mpivady niaraka tamin’ny zanany kely vao herintaona sy iray volana monja no nalefan’ny môtô tany an-kady ka nifatratra tamin’ny andrin-tany hany ka naratra be avokoa rehefa nikasa ny hamonjy fodiana. Raha araka ny vaovao azo omaly hariva dia namoy ny ainy ilay tsy manan-tsiny kely izay nipitika teny amin’ny arabe mihitsy nandritra ny fotoana nitrangan’ny loza. Izy mivady kosa indray nifatratra tany amin’ilay andrin-tany niaraka tamin’ilay môtô ka ilay renim-pianakaviana no tena voamafy raha ny fanazavan-dreniny. Tapaka mantsy ny tanany sady mangana be sy vaky toy ny novonoina ihany koa ny handriny. Teny amin’ny hopitaly CHRD Bongatsara izy ireo no notsaboina vonjimaika taorain’ny nitrangan’ny loza ary nanaovana antso avo tamin’ny tambajotram-pifandraisana ireo fianakaviany sy izay olona mety mahalala azy ireo. Vetivety foana anefa dia tonga ny hafatra ka efa nafindra eny amin’ny hopitaly HJRA izy mivady, omaly. Raha araka ny fantatra dia eny Mandroseza izy telo mianaka kely ireto no mipetraka. Raha ny vaovao farany azo dia vokatry ny fivoahan’ilay môtô tamin’ny lalana ara-dalàna no nampifatratra azy ireo tamin’ilay andrin-tany be.

Pati