Fifamoivoizana

Mazda nihitsoka familiana 1 maty, 3 naratra

Fifamoivoizana
Zoma 08 Febroary 2019

Tamin'ireo dimy mpandeha, telo naratra mafy, iray maty tsy tra-drano. Io no vokatry ny lozam-pifamoizana tamin'ny talata 5 febroary farany teo, sahabo ho tamin'ny 9 ora alina, araka ny loharanom-baovaon'ny zandarimariam-pirenena eo Andrefan'Ambohijanahary.

Raha iny nizotra hihazo an'i Mahabo, Distrikan’Ankilizato iny ny fiara mpitatitra marika "Mazda", avy any Antsirabe hihazo an'i Morondava no nihitsoka tampoka ny familiana ka niala ny lalana ary namantana tamin'ny vatan-kazo. Rehefa avy nifandona tamin'io vatan-kazo io ilay fiarakodia, teo amin'ny PK 320 +120 an'iny lalam-pirenena faha-35 iny, nivarina tany anaty hantsana, araka ny fampitam-baovaon'ny zandary. Ny Borigadin'ny zandarimariam-pirenena ao Ankilizato no nanatanteraka ny fitsirihina.

Araka ny loharanom-baovao any an-toerana, noho ny tahotra ny dahalo mpanakan-dalana matetika, mirifatra ny mpamily amin’iny faritra iny, indrindra amin’ny alina tahaka ity tranga farany ity. Tsy vitsy ny loza mety mitranga. Ary amin’ny fisian’ny lozam-piarakodia toy izao, manararaotra ireo dahalo mandroba. Tsara vintana anefa ireto tra-doza ireto fa nampandre ny zandary teo akaiky ka tsy tratran’ireo malaso fa tonga ara-potoana ireo mpitandro filaminana. Mampitaraina ireo mpandeha ihany koa ny fahasimban’ny lalana.

Haja Nirina.