Fifamoivoizana

Partagé sur :
• facebook

Fito no naratra mafy, lehilahy iray sy renim-pianakaviana bevohoka miaraka amin’ny zanany tao an-kibony no maty tsy tra-drano vokatry ny lozam-piarakodia 3 km tsy hiditra an’ny “Camp Robin” amin’ny lalana ihazo an’ny Fianarantsoa.

Taksiborosy mpitatitra avy aty Andrenivohitra ihazo an’ny Toliary ity tra-pahavoazana ity. Niainga tamin’ny zoma hariva avy teto Antananarivo izy io, tamin’ny 7 maraina afak’omaly sabotsy no nitranga ny loza. Tsy nisy fiara nifandona taminy fa nidofotra tamin’ny andrin-tany tamin’ny fiolahan-dalana no nahapotika ilay fiara. Raha ny filazan’ireo mpandeha sy ny mpanatri-maso, vokatry ny fandehanana mafy nefa niezaka niala lalan-dratsy tampoka no nahatonga ny loza ka tsy voaverin’ny mpamily amin’ny lalana ny fiara. Misy ihany koa anefa nilaza fa mety vokatry ny harerahana sy ny torimaso izany. Raha ny loharanom-baovao azonay.Nentina teo amin’ny ivon-toeram-pitsaboana teo Camp Robin ireo namoy ny ainy ka ny hopitaly no nandray an-tanana ny fikarakarana ny razana sy nandefa ny filazana tamin’ny mpitandro filaminana

sy ny haino aman-jery ary ny tambazotran-tserasera nentina nampalalana sy nampitadiavana ireo havany. Ankoatran’ny sosialin’ny toeram-pitsaboana sy ny fivarotam-panafodin’ny hopitaly, ireo olona teo amin’ny manodidina tsara sitrapo no nifamonjy tamin’ny vonjy aina tahaka ny fanomezan-dra sy ny sakafo ho an’ireo naratra mafy. Amin’izao ora hanoratanay izao, mbola misy marary tsy manana fianakaviana ao amin’ny hopitaly ka nanao antso avo na ho an’ny mponin’ny Toliary hitodihan’ny fiara na ny avy aty an-drenivohitra izay fianakaviana nanana havana niainga tamin’ny zoma tolakandro hianantsimo ny tomponandraikitra ny toeram-pitsaboana mba hiantso any an- toerana amin’ny laharana 0341666728.

Haja Nirina

Tia Tanindrazana

Samia mijoro ho an'i Gasikara.