Fifamoivoizana

Lalana mihotsaka eny Anjanahary Ahiana hitera-doza

Fifamoivoizana
Alatsinainy 28 Janoary 2019

Maro ny lalana mihotsaka eto an-drenivohitra ankehitriny noho ny fahalemen’ny tany vokatry ny rotsak’orana. Nahitana izany ny teny Betongolo, Anjanahary II S mialoha ny hidinana an’i Masikara manakaiky trano efa somary antitra.

Manaitra ireo tompon'andraikitra mba hijery ity lalana ity fa tena efa kely dia kely sisa no tsy hihotsahany tanteraka kanefa dia lalana anisan'ny be fifamoivoizana, hoy ny fitarainan’ny manodidina. Efa tena mihotsaka tanteraka ary ahiana hitera-doza eo an-toerana izy io satria efa misy amin’ireo vato be aza no nianjera. Marefo tanteraka eo amin’io làlana io, ka mila mitandrina na ny fiara na ny mpandeha an-tongotra mandra-pisian’ny vahaolana mafonja raisin’ny manam-pahefana. Maro ny toerana saika manerana ny Nosy no misedra olana amin’izao fotoam-pahavaratra izao, raha tsy hilaza afa tsy ny tany Ambilobe nitoka-monina mihitsy izay nanaovana fanairana teto ka nitondran’ny fitondram-panjakana fanampiana ara-tsosialy, toy ny sakafo. Miandrandra vahaolana maharitra ny rehetra.

Toky R