Fifamoivoizana

Koperativa Tselatra Nitokona ny mpitatitra

Fifamoivoizana
Alatsinainy 10 Septambra 2018

Tsy nisy niasa na dia iray aza ny mpitatitra mivondrona ao amin’ny koperativa Tselatra tamin’ny faran’ny herinandro teo.

Ny 146, 146D, 147, 147Bis ary 178 no nanao ny fitokonana noho ny tsy fanekena ny fanapahan-kevitra noraisin’ny tompon’andraikitra ao amin’ny koperativa. Nisy mantsy ny fampiharana ny sarandalana tokana ho 400 Ariary ary tsy hasiana intsony ny tapa-dalana. Miteraka fatiantoka izany araka ny nambaran’izy ireo satria tsy hisy handeha aminy intsony ny mpanjifa fa aleony mitaingina ny zotra hafa izay mbola mandray sarandalana 200 Ariary sy 300 Ariary. Ankoatra izay, nitaraina ihany koa izy ireo ny amin’ny didy jadona misy eo anivon’ny koperativa tahaka ny fangalana ny latsakemboka mavesatra isan’andro izay mahatratra 6.000 hatramin’ny 7.000 Ariary. Etsy an-daniny dia nanambara ny filohan’ny koperativa Tselatra, Rakotonirina Jean Louis Emile fa hanazarana ny mpanjifa handoa ny sarandalana 400Ariary io mialoha ny fiakarana ho 500 Ariary atsy ho atsy. Tsy azo ihodivirana, hoy ity filoha ity ny fisondrotan’ny sarandalana atsy ho atsy noho ny hiakaran’ny solika. Handrasana ny vokatry ny fifampiresahana tamin’ny mpitatitra sy ny koperativa amin’izao fiandohan’ny herinandro izao na dia nisy aza ny fangatahan’ireo mpitatitra ny fialan’ny tompon’andraikitra ao amin’ny koperativa.

Tsirinasolo