Fifamoivoizana

Katsepy - Sambo rendrika Nieren-doza izy 13 nentin’ny “Fanantenana”

Fifamoivoizana
Alarobia 27 Desambra 2017

Ny sambo “Fanantenana” ity dobo an-dranomasina tany Katsepy ity raha tokony hihazo an'i Tambohorano,

75 km miala an'i Maintirano. Niala tao Mahajanga ny alatsinainy 25 desambra, krismasy misasakalina ilay sambo. Tra-doza, natsipin'ny ranomasina rehefa tonga tao Antrema ambadiky ny jirobe (phare) Katsepy ka nidona tamin'ny vato rehefa nahazo sisiny. Nisy fahavakisana tamin'ny vatany ary dia nidiran'ny rano. Avotra avokoa ireo mpandeha niisa 13 tao anatiny fa ny entana nentiny no lena ny antsasa-manila na dia efa novonjena navoaka aza. Tsy hay izay tena olana na resaka teknika tamin'ity sambo ity na vokatry ny rivotra (mantasaly) izay nahery be tato anatin'ny herinandro izay ka raha tsy motera matanjaka tsara tsy mahatohitra io mantasaly io. Efa tafaverina ao Mahajanga omaly avokoa ireo mpandeha tao anatin'ilay sambo raha ny fanazavana avy amin'ny talem-paritry ny APMF ao Mahajanga, Tianjara Maurice.

Nangonin’i Jean D.