Fifamoivoizana

Fitroafana Talatamaty Noraisina ara-teknika ilay lalana nasiam-panamboarana

Fifamoivoizana
Alatsinainy 05 Septambra 2022

Vita soamantsara ny lalana ao amin’ny VC1 Fokontany Fitroafana, kaominina Talatamaty, distrikan’Ambohidratrimo.

Ny faran’ny herinandro teo no noraisina ara-teknika izany, notarihin’ny Ben’ny tanana Raharinoasy Elie Dominic sy ireo ekipa nandray an-tanana ny asa fanamboaran-dalana. Raha tsiahivina kely dia roa volana latsaka izay no nanamboarana ity lalana ity izay natao rarivato. Nandratra olona sy namotaka hatrany izy io isaky ny fotoam-pahavaratra teo aloha hany ka tsy vitsy ireo nitondra takaitra indrindra fa ireo ankizy madinika sy ny zokiolona. Nanentana ireo mponina ao amin’ity Fokontany ity araka izany ny Ben’ny tanana mba hikajy sy hanaja ny foto-drafitrasa iombonana tahaka izao ho tombontsoan’ny rehetra. Ny tsy mahay manaja sy ny tsy manana mantsy raha ny nambarany dia mitovy ihany. Hitohy any amin’ny Fokontany hafa indray moa ny asa fanamboarana izay marihina fa lalana kaominaly avokoa. Toraka izany koa ny asa fanamboarana sy fanitarana ny tsena raha tsy latsa-danja amin’izany ny fanavaozana ny biraon’ny kaominina.
Pati
Legende : Nandritra ny fandraisana ara-teknika ny lalana tamin’ny Sabotsy teo