Fifamoivoizana

Fitaterana an-tsokosoko Nafangaro tamin’ny trondro ny olona

Fifamoivoizana
Alakamisy 09 Jolay 2020

Fiara fourgon iray no tratra niditra an-tsokosoko tany amin’ny distrikan’i Fenoarivo Atsinanana afaka omaly.

Avy any Toamasina io fiara io ary nilaza fa hanatitra tondro any Fenoarivo Atsinanana. Somary nahavariana ireo mpitandro ny filaminana nanao sakana teo Namakoa anefa izany fanaterana trondro izany ka nosavaina avy hatrany ilay fiara. Tratra tao ambadik’ireo trondro nolazain’ilay mpamily sy ny mpanampy azy ireo olona miisa valo izay fantatra fa nikasa hamonjy fodiana any Fenoarivo Atsinanana. Naverina avy hatrany any Toamasina ireo olona valo ireo raha notanana natao fanadihadiana kosa ilay mpamily sy ny mpanampy azy. Naiditra ambalam-pamonjana ilay fiara. Nomarihin’ireo tompon’andraikitra any an-toerana fa na dia efa vitsy aza ireo mararin’ny coronavirus ao Toamasina dia mitohy hatrany ny ady hatao amin’ity valan’aretina ity ho fitandroana ny fahasalaman’ny mponina.

Pati