Fifamoivoizana

Partagé sur :
• facebook

Hetsika ara-kolontsaina iray tena malaza eto amintsika ny Donia isan-taona. An’alin-kisa mantsy ireo olona avy any amin’ny faritra sy firenena maro samihafa tonga any Nosy-Be mba hijery fotsiny ity Festival ity.

Tsy misy  zotra-pitaterana afa-tsy amin’ny alalan’ny sambo anefa miazo ity Nosy manitra ity, antony nanosika ny APMF ((Agence Portuaire, Maritime et Fluviale) hidina any an-toerana hanatevina ny fahaiza-manaon’ireo ekipa any an-toerana izay hijanona any an-toerana mandavan-taona mihitsy.  Tanjon’izy ireo raha araka ny fantatra ny  hampirindra ny fitaterana an-dranomasina  mandritra ny Festival Donia hisorohana ny loza mety hitranga. Tafiditra ao anatin’izany ny fanaraha-maso ifotony ireo fepetra mikasika ny tantsambo, ny sambokely hampiasainy,  ary ny fahafahana mampiasa ny seranan-tsambo. Hiara-kiasa akaiky amin’ireo tompon’andraiki-panjakana sy ny sehatra tsy miankina misahana ny fitaterana an-dranomasina any an-toerana izy ireo mandritra izany. Hisy ihany koa raha araka ny fantatra ny fampitomboana ny fanaraha-maso ireo sambokely miasa ao amin’ny seranan-tsambon’Ankify sy ny ao amin’ny seranan-tsambon’i Nosy-Be hell-ville ary ny ao Ambarovato. Sambany no hisy fanaraha-maso tahaka izany  any an-toerana ho  an’ity farany. Marihina  fa sambokely miisa 80 isan’andro no miasa mampitohy ireo zotra ireo manomboka amin’ny 06 ora maraina ka hatramin’ny 04 ora hariva ao Nosy-Be. Anisan’ny antony nanosika ny APMF sy ny Ministera miadidy azy handray ny andraikiny izany ho fiarovana ny ain’ny mpandeha.

Pati

Tia Tanindrazana

Samia mijoro ho an'i Gasikara.