Fifamoivoizana

Fifamoivoizana eto an-drenivohitra Novelomina ireo “Marquage au sol”

Fifamoivoizana
Alakamisy 06 Jolay 2017

Novelomin’ny kaominina Antananarivo ireo mari-pamantarana mandry amin’ny arabe na « Marquage au sol » sasantsasany eo anivon’ny fari-piadidiana ny tanànan’Antananarivo mba hanamorana ny fandaminana ny fifamoivoizana.

Nosantarina tamin’ny talata 4 jolay teny amin’ny fiantsonan’ny taksibe eny ambonin’ny tetezan’i Behoririka ny asa fanajariana, izay notontosain’ny ekipan’ny DTP (Direction des Travaux Publics), DTMU (Direction Technique et Mobilité Urbaine). Hitohy eny Ankadifotsy, Vohibola ary hofaranana eny Analamahitsy ny asa. Niara-nisalahy tamin’ny kaominina ny IMV (Institut des Metiers de la Ville), izay nanolotra fitaovana maro toy ny loko, fitaovam-pandokoana, fitafiana manokana ho an’ireo manao ny asa. Na misy aza ezaka ataon’ny kaominina sy ny mpiara-miombon’antoka aminy amin’izao asa fanatsarana ny tontolon’ny fifamoivoizana izao, dia mandeha ila ihany raha mbola misy foana ny tsy fanarahan-dalàna. Zava-dehibe ny fiezahan’ny rehetra manaja ny lamina napetraka satria zava-poana ihany ny fanajariana natao sy mbola hatao raha samy hanao izay saim-patany hatrany ny mpitondra fiara, ny mpandeha an-tongotra, ny mpivarotra. Tsy vitan’ny kaominina samirery ny fanarenana ny renivohitra fa tompon’andraikitra avokoa ny isam-batan’olona.

Toky R