Fifamoivoizana

Fiara mibahan-dàlana eto Iarivo Mila miala ao anatin’ny 8 andro

Fifamoivoizana
Alakamisy 21 Novambra 2019

Namoaka fampahatsiahivina ny Kaominina Antananarivo Renivohitra (CUA), fa rarana ny fametrahana sy famelana karazana entana, toy ny fiara na fiara maty eny amoron’arabe sy eny amin’ny toerana voarara.

Efa voafaritry ny didim-pitondrana laharana faha-95-291 tamin’ny 18 aprily 1995 mikasika ny “fourrière” nohatsaraina sy nofenoin’ny didim-pitondrana 96-583 tamin’ny 7 jolay 1997 io. Namoaka fampahafantarana noho izany ny kaominina nanomboka omaly alarobia 20 novambra fa tsy maintsy esorin’ny tompony ao anatin’ny 8 andro nanomboka tamin’io daty io ireo fiara na entana mibahana eny amoron’ny arabe sy ny toerana voarara. Ny Tsy fanajana izany dia manery ny CUA handray fepetra mifanaraka amin’izany, hoy ny fampitam-baovao nosoniavin’ny Tale Jeneralin’ny CUA Atoa Landy Raveloson. Tafiditra ao anatin’ny fandaminana sy fampanajana ny lalàna hisian’ny firindrana eto an-drenivohitra izany, ka tokony hanaja sy hankato ny lalàna ny rehetra.

Toky R