Fifamoivoizana

Fiakaran’ny saran-dalana 500 ariary no tanjon’ireo mpitatitra, hoy ny RNDC

Fifamoivoizana
Alakamisy 12 Aprily 2018

Manohitra amin’ny heriny tanteraka ny fiakaran’ny saran-dalana ho 700 Ar manomboka amin’ny 25 aprily ho avy izao ny fikambanana mpiaro ny zon’ny mpanjifa RNDC tarihin’ny filohany Rabetsara Lita.

Hangataka fihaonana an-databatra boribory amin’ny mpitatitra sy ny minisitera izy ireo hahafahana mijery ny marimaritra iraisana sy mampihaona mivantana ny roa tonta. Ho an’ny minisiteran’ny Fitaterana dia mila omen’izy ireo ara-dalàna sy ara-potoana ny vola fanampiana omena ireo mpitatitra izay natao indrindra hanamaivanana ny vidin-tsolika hisorohana ny fiakaran’ny saran-dalana tahaka izao. Volan’ny mpanjifa mirotsaka any anaty kitapom-bolam-panjakana mantsy, hoy hatrany izy ireny fanampiana omena ny mpitatitra ireny. Ho an’ny mpitatitra indray, hoy izy raha tsy maintsy izay fampiakarana saran-dalana izay no tena tanjony dia tokony hampanaovina taratasy mazava eny anivon’ny faritra hiasany izy ireny mba hanajany ny bokin’andraikitra ka tsy hisian’ny fihodinana an-dalana intsony. Tokony hojerena ihany koa ny fiakaran’ny vidin-tsolika sy ny fampiakarana saran-dalana fa tsy izay tian’ny mpitatitra no hatao. Na izany aza anefa dia nomarihin-dRabetsara Lita fa ilay fampiakarana saran-dalana 500 Ar no tena tian’ireo mpitatitra hatao satria mitifi-danitra te hahazo tendrombohitra izy ireo.

Pati