Fifamoivoizana

Fehezan-dalàna mifehy ny fitaterana an-dranomasina Efa tena lany daty ny an’i Madagasikara

Fifamoivoizana
Talata 08 Janoary 2019

Nanatanteraka atrikasa nasionaly tetsy amin’ny hotely Sakamanga Antsahavola omaly alatsinainy 7 janoary ny minisiteran’ny fitaterana sy ny famantarana ny toetr’andro miaraka tamin’ny antokon-draharaha misahana ny fitaterana an-dranomasina sy ny ranomamy (APMF).

Atrikasa haharitra 5 andro ary ny minisiteran’ny fitaterana mihitsy no nangataka fiaraha-miasa avy amin’ireo manampahaizana manokana ny amin’ny lalàna mifehy ny ranomasina avy amin’ny fikambanana iraisam-pirenena mikasika ny fitaterana an-dranomasina (OMI). Efa nilaozan’ny toetrandro satria efa tamin’ny taona 2000 ny fehezan-dalàna mifehy ny fitaterana an-dranomasina eto Madagasikara ka rariny raha hohatsaraina. I Madagasikara dia mpikambana ao amin’ny OMI ary tsy maintsy misy ny fitsirihana (audit) atao amin’ny firenena ao ny amin’ny fampiharana ny lalàna mifehy ny fitaterana an-dranomasina. Tamin’izany indrindra no nahitan’izy ireo fa tsy ampy sy efa tena tsy manaraka ny toetrandro intsony ireo fehezan-dalàna misy. Maro ireo fifanarahana iraisam-pirenena efa tokony hampidirina amin’ireo fehezan-dalàna mifehy ireo ary ilaina voafehin’ireo manampahaizana misehatra amin’ny lalàna amin’ny fitaterana an-dranomasina eto Madagasikara izany. Ny fahalotoana sy ny fandriampahalemana eny an-dranomasina izao dia tsy voarakotry ny lalàna misy eto amin’ny firenena ka anisan’ny anton’ity atrikasa ity ihany koa izany.

Tsirinasolo