Fifamoivoizana

Fanitaran-dalana Anosizato – Fenoarivo RN1 Manjavozavo ny resaka

Fifamoivoizana
Alatsinainy 22 Janoary 2018

Anisan’ny resa-be nitana ny sain’ny rehetra tato ho ato ny mikasika ny fanitaran-dalana hatao any amin’iny lalam-pirenena voalohany iny. Miainga etsy Anosizato izy io raha araka ny nambaran’ny filoham-pirenena.

Ezahana hahazaka fiara efatra mifanena ny tetezana mba hialana amin’ny fitohanana lavareny, mipaka hatrany Fenoarivo Atsimondrano any. Tsy maintsy hisy, araka izany, ny fandrodanana trano izay hahakasika olona marobe tokoa. Ho an’ny kaominina Ampitatafika manokana dia misy maromaro ireo olona voakasika. Samihafa anefa ny vaovao voarain’izy ireo amin’ny ankapobeny. Misy ireo efa nahazo karazana taratasy toy ny recensement mihitsy manadihady ny momba ny taratasin’ny tranony na ara-dalàna na tsia. Misy koa anefa ireo nilazana mivantana fa any amin’ny Mateza tôle ny fanitaran-dalana. Santionany amin’izany ireto olona nanaiky niresaka tamin’ny gazety Tia tanindrazana ireto.

Ramatoa Fara : Ny anay ny tranon-drazana mihitsy no voakasika raha tanteraka io tetikasan’ny filoham-pirenena io. Efa tamin’ny taona 1919 anefa no efa tranonay io ary anananay taratasy ara-dalàna. Misy amin’io faritry ny tranonay io anefa no tsy maintsy ho lasa raha sanatria ka tanteraka izany. Fa ny mahavariana aloha hatreto dia ny feo renay fa tsy hisy fandrodanana trano izany ety Ampitatafika e ! Eny amin’ny Mateza tôle, hono, mantsy vao mety hanomboka izany, raha hisy.

Ramatoa Raniry : Ny zavatra tsikaritro hatramin’ny nivoahan’iny resaka iny fa hisy fandrodanana trano ety Ampitatafika dia efa misy taratasy mandehandeha any rehetra any manadihady ny momba ilay trano mety voakasika. Tafiditra ao anatin’izany ny akora nanaovana azy, nahazo taratasy fahazoan-dalana avy any amin’ny kaominina ve ? iza no misoratra aminy, tamin’ny taona firy…. Na izany aza anefa dia anisan’ny vaovao hafa renay koa ny hoe : raha mbola lany io filoham-pirenena ankehitriny io dia tsy maintsy hotanterahiny ity tetikasa ity fa raha tsy lany intsony izy dia hijanona eo.

Pati