Fifamoivoizana

Fandikan-dalàn’ny Taksibe Ivato Niditra an-tsehatra ny CIR sy ny polisy kaominaly mihitsy omaly

Fifamoivoizana
Alarobia 05 Desambra 2018

Diso be loatra ny tsy fanarahan-dalàna hataon’ireo taksibe mampitohy an’i Vassacos amin’Ivato ao amin’ny zotra D.

Raha araka ny fantatra mantsy dia mihamahazo vahana hatrany ny fanariana mpandeha eny an-dalana, indrindra amin’ny andro hariva, ny tsy fanajana mpandeha, ny fandraisana olona eny amin’ny toerana tsy tokony hanaovana izany…hataon’izy ireo. Mba ho famerenana amin’ny laoniny ny fitateram-bahoaka eny amin’iny faritra iny ary dia nidina ifotony teny an-toerana mihitsy ireo mpitandro ny filaminana eo anivon’ny CIR ( Cellule d’intervention routière) nanomboka omaly, notronin’ny pôlisy kaominaly. Hijery sy hanara-maso ny fomba fiasan’ireo taxi-be no tanjon’izy ireo amin’izany, indrindra amin’izao ankatoky ny fety izay mahabetsaka ny olona mifamezivezy izao. Fisintonana avy hatrany ny taratasy fahazoan-dalana mamily fiarakodia ho an’ny mpamily sy ny fanaovana “fourrière” ny taksibe moa no sazy miandry avy hatrany ireo mpitatitra tsy manara-dalàna izay mety hiafara amin’ny fampiatoana ilay mpamily amin’ny asany mihitsy raha toa ka ilaina izany. Tsiahivina moa fa anisan’ny tazana nanampy ny CIR sy ny polisy kaominaly teny an-toerana ihany koa omaly ny zandary hananan’ny mpanjifa fitoniana sy filaminan-tsaina.

Pati