Fifamoivoizana

Fanatsarana ny fitateram-bahoaka Hametraka politika mazava ny UCTU

Fifamoivoizana
Alakamisy 16 Novambra 2017

Mitohy hatrany ny ezaka tanterahin’ny fivondronan’ny mpitatitra eto Antananarivo Renivohitra na ny UCTU manoloana ny fanatsarana ny asa fitateram-bahoaka eto amintsika.

Ankoatra ny fanavaozana ny birao sy ny rafitra mba hifanaraka amin’ny filan’ny asa fitaterana dia hametraka planina sy politika mazava mikasika ny asa fitateram-bahoaka eto an-denivohitra ihany koa izy ireo. Hiarahany amin’ny kaominina Antananarivo Renivohitra izany, hoy Rakotonirina Jean Emile, filoha lefitry ny UCTU sady filohan’ny koperativa Tselatra. Tena sahirana ny mpandraharaha noho ny tsy fisian’ny fanampiana. Betsaka amin’izy ireo no maka vola any amin’ny banky mba hividianany fiarakodia ary mamerina izany ao anatin’ny roa na telo taona…Olana anefa ny fanapahan-kevitra mety horaisin’ny fitondram-panjakana amin’ny fanafarana fiara maro avy any ivelany hampanaovina taksibe eto amintsika, antony manosika azy ireo hametraka io politika io. Efa eo am-pamolavolana ny « Plan de reforme et d’amélioration » izy ireo ankehitriny fa tsy hiandry fotsiny ny minisitera sy ny kaominina. Ezahina hovitaina ao anatin’ny iray volana sy tapany ny hetsika satria ho tapitra amin’ny faran’ny taona ho avy izao sahady ny fotoana hiasan’ny birao teo aloha.

Pati