Fifamoivoizana

Famendrahana ranom-panafody Taxi-be 160 isa no nenjehina omaly ho an’Itaosy

Fifamoivoizana
Alarobia 22 Aprily 2020

Mafy ny tsy nidiram-bola tao anatin’ny iray volana ho an’ireo tompona taxi-be, indrindra fa ireo mpamily sy ny mpanampy azy noho ny hamehana ara-pahasalamana.

Samy nihazakazaka nanondraka ranom-panafody ny fiarany avokoa ny rehetra nanomboka omaly araka izany, baiko avy amin’ny Filoham-pirenena sy ny Ministeran’ny fitaterana iadiana amin’ny fiparitahan’ny tsimok’aretina COVID 19. Ho an’ny tananan’Itaosy manokana izay ahitana koperativam-pitaterana miisa efatra dia fantatra fa fiara miisa 160 no tsy maintsy nenjehina omaly izay nifampizaran’izy ireo. Vao maraina araka izany dia efa samy nihazakazaka namonjy laharana ny rehetra raha tamin’ny 02 ora folakandro kosa no fotoana nomena azy ireo. Raha araka ny fanazavan’ny lehibena koperativa iray dia mbola hitohy anio Alarobia izany fanondrahana ranom-panafody izany ho an’ireo mbola tsy nahavita izany. Mikasika ilay fahafahana miasa kosa dia nanambara ity lehibena koperativa iray ity fa mbola tsy fantatra mazava ny mikasika ilay fanandaminana mikasika ny laharan’ny fiara an-kasa sy tsy an-kasa. Misy amin’ireo koperativa mantsy hoy izy no an-kasa avokoa ny laharany ka iza no alefa sy tsy alefa ? Tsiahivina moa fa narahina fizarana aron-tava ho an’ny mpamily sy ny mpanampy azy ny hetsika raha nasiana soratra ihany koa ny fiarakodia izay vita izay fanondrahana ranom-panafody izay.

Pati