Fifamoivoizana

Fahatapahan’ny RN 7 Mbola tsy nahazo filazana ôfisialy ny mpitatitra hatramin’ny omaly

Fifamoivoizana
Sabotsy 14 Aprily 2018

Raha araka ny feo mandeha dia ho tapaka ny lalam-pirenena fahafito manomboka ny Alatsinainy 17 Aprily ho avy izao ka hatramin’ny Alarobia 19 Aprily. Noho ny asa fanamboarana tsy maintsy hatao amin’ny tetezana ao amin’ny PK 84+950 ao Ambohimandroso no anton’izany.

Hatramin’ny omaly nanaovanay ny fanadihadiana anefa dia nanambaran-dRakotondrafa Fredinard filohan’ny ASTRAM fa mbola tsy nahazo filazana ôfisialy avy amin’ny Ministeran’ny asa vaventy ny tenany mikasika izay fahatapahan’ny lalam-pirenena fahafito izay. Vahaolana horaisin’izy ireo araka izany raha tena mitombina tokoa io feo mandeha io fa ho tapaka manomboka amin’ny Alatsinainy ny lalana dia ny fanaovana ny transbordement. Mety hampiakatra ny saran-dalana tampoka anefa izany hoy izy noho ny fandaniana tsy maintsy hataon’ny mpitatitra na koa miandry ny fahavitan’ilay tetezana mihitsy vao mandeha miasa ny mpitatitra. Tsiahivina moa fa mbola tonga soa aman-tsara teny amin’ny fasan’ny Karana avokoa omaly ireo mpitatitra niazo ny lalam-pirenena fahafito no sady tsy mbola nisy nahazo vaovao ihany koa mikasika ity fahatapahan-dalana kasaina hatao ao Ambohimandroso ity.

Pati