Fifamoivoizana

Antananarivo Renivohitra Tsy hiasa mandritra ny 3 andro ny taksibe

Fifamoivoizana
Alatsinainy 27 Aogositra 2018

Tsy sangisangy, hoy ny filohan’ny fivondronan’ireo mpitatitra eto Antananarivo Renivohitra (UCTU) Atoa Lova Randrianatoandro ny fitokonan’ny taksibe mandritra ny telo andro fa tena hisy.

Fiandohan’ny herinandro na alatsinainy tahaka izao no hanombohan’io fitokonana io izay natao indrindra hanairana ny Fitondram-panjakana mba hampidina ny vidin-tsolika fa tena tsy zakan’izy ireo intsony. Efa ela ihany izahay no nametaka ny petadrindrina momba ny tokony hampidinana ny vidin-tsolika saingy tsy misy mihaino. Avelanay hataon’ireo mpitatitra izay mahita solika mora ny fitaterana mandritra ireo telo andro ireo, hoy hatrany izy. Mikasika ilay saran-dalana 500 Ar hihatra manomboka ny 01 septambra ho avy izao dia nambaran’Atoa Lova Randrianatoandro fa tena ireo tompona fiara mihitsy no nanapa-kevitra mikasika azy io fa tsy izy ireo intsony. Mahatsiaro matiantoka tanteraka mantsy ny tompona fiara, hoy izy, arahin’ny fidangan’ny vidin’ireo kojakoja ilaina. Ankoatra ity fiakaran’ny vidin-tsolika sy kojakoja ilaina amin’ny fiara ity dia tsy neken’ny antokon-draharaha misahana ny fitaterana an-tanety ihany koa ilay fitondrana olona manao special hataon’ny taksibe mivoaka mankany amin’ny faritra. Anisan’ny mahatezitra azy ireo taxi-be ihany koa izany saingy raha ny feo re tamin’ny faran’ny herinandro teo dia mety hihemotra amin’ny fanapahan-keviny indray ny ATT.

Pati