Fifamoivoizana

Anosizato – Ampitatafika sy Itaosy Halalahana ny arabe

Fifamoivoizana
Zoma 18 Janoary 2019

Raikitra ihany ny asa fanitarana sy fanatsarana ny lalana mihazo iny distrikan’Atsimondrano sy lalam-pirenena voalohany (RN1) iny.

Ao anatin’ilay tetikasa Lot 4, iarahana amin’ny orinasa China Railway izy io, asa manomboka etsy amin’ny tetezan’Anosizato, ilay toerana be fitohanana mihitsy miampita mankany amin’ny tetezana hiditra an’Ampitatafika. Toraka izany koa ny etsy Ampasika izay tena mampitaraina ny maro tokoa mihazo ny cité des assureurs Itaosy, miampy ny lalana fihodinana boribory etsy Antanimenakely. Mitotaly 11 km sy 750 m izy io raha araka ny fanazavana azo omaly, asa haharitra hatramin’ny volana aogositra ho avy izao. 38 miliara Ar no vola holaniana amin’izany, izay hiantohan’ny firenena Sinoa avokoa.Niara-nahita ny rehetra nanomboka omaly alakamisy fa efa noesorina ny “Trottoir” amin’ny lalana manomboka eo amin’ny tetezan’Anosizato mizotra mankany Ampitatafika satria halalahana ny arabe, izany hoe ampitomboina ny sakany. Na izany aza anefa dia tsy hisy ny fandrodanana trano, fepetra izay tena notakian’ireo mpamatsy vola hisorohana ny mety ho fandoavam-bola hafa indray amin’ireo tompon’ny trano na tamboho tsy maintsy arodana. Andraikitra horaisin’ireo kaominina voakasika toa an’Ampitatafika sy Andranonahoatra, araka izany, ny hanome tanana amin’ny fandrindrana ny fifamoivoizana mandritra ny asa fanamboarana amin’ny alalan’ireo mpitandro ny filaminana efa manana traikefa amin’izany. Tsiahivina moa fa hasiam-panamboarana ihany koa ireo lalana ratsy raha ovana endrika ihany koa ny lalana hampiasain’ny mpandeha an-tongotra. Nofaranana tamin’ny famonoana omby fomba amam-panao Malagasy sy fiaraha-misakafo ny lanonana omaly.