Fifamoivoizana

Andravoahangy tsena Haharitra 20 andro ny fanamboarana ireo lalan-dratsy

Fifamoivoizana
Alarobia 08 Aogositra 2018

Napetraka omaly ny vato fehizoro fanohizana ny fanamboarana ny lalana miditra eo Ambodivona, Andravoahangy tsena,

Faritra faharoa, manoloana ny fivarotana voamaina, nitarika izany ny delegen'ny Boriborintany fahatelo, Rado Andriamamonjisoa sy ny filohan'ny fokonolona, Germain Ranaivoarison ary ny mponina rehetra teny an-toerana. Ny anton’ny fanatsarana dia noho ny fanentanana nataon'ny Boriborintany fahatelo tamin'ny mponina teny an-toerana noho ny fahitana fa tena simba tanteraka ny lalana miditra mankany. Tsapan'ny mponina fa tena sahirana ry zareo amin'ny fidirana eo amin'ny lalana satria tena simba tanteraka. Tsy azon'ny fiara idirana ary tena dibo-drano rehefa fahavaratra. Tsy nikely soroka ny mponina manodidina teny an-toerana nanome tanana tamin'ny fanamborana ny lalana, izay hatao rarivato, raha ny fanazavana. Mirefy 50 metatra eo ny halavany ary 5 metatra ny sakan’ny lalana hamboarina ary haharitra 20 andro eo ny faharetan'ny asa.

J. Mirija