Fifamoivoizana

Ady amin’ny fandikan-dalàna ataon’ny taksibe Mijoro ho kaominina modely Andoharanofotsy

Fifamoivoizana
Sabotsy 07 Jolay 2018

Anisan’ny olana sedrain’ny mpandeha rehetra eto an-drenivohitra amin’izao ny tsy fanarahan-dalàna ataon’ny taksibe. Ankoatra ny tsy fanajana mpandeha miafara amin’ny fanompana indraindray, ny tsy fanomezana famerim-bola dia anisan’ny maharary mafy ny rehetra ny fanariana ny mpandeha eny antenantenan-dalana.

Mijoro hanohitra izany ny kaominina Andoharanofotsy fa tsy mijery fotsiny ny ataon’ny kaominina sasany. Nandray fepetra izy ireo sy ny lehiben’ny koperativa nanomboka ny fiandohan’ny herinandro teo ka nosaziana izay tratra. Nisy mihitsy ireo naiditra fourriere izay nomarihin’ny Ben’ny tanàna fa tsy entina hitadiavam-bola akory sanatria fa ho famaliany ny hetahetan’ny mpanjifa rehetra. Efa nisy moa ny fihaonan’ny mpikambana tao amin’ny koperativa Soamiafara ( 137,187) tamin’ny Ben’ny tanànan’Andoharanofotsy Ranirison Hasina ka nitarainan’izy ireo ny fifidianan’ny mpanjifa fiara fa tsy mandeha amin’izay misy. Rehefa tena mafy loha tsy mety hahitsy ireo mpitatitra ao aminy dia hampiditra koperativa vaovao hafa mihitsy izy ireo ka afaka manatona azy ireo avy hatrany izay vonona. Tsiahivina fa efa tany amin’ny 20 taona lasa, mbola 200 Ar ny saran-dalana no nampanantena izy ireo fa hanatsara ny tolotra omeny ny mpanjifa saingy mandraka androany dia mijanona ho resa-be fotsiny.