Fampianarana

Vondrona CPE Mankalaza ny faha-20 taona niorenany

Fampianarana
Alatsinainy 04 Desambra 2017

Feno 20 taona omaly alahady ny vondrona CPE manerana ny Nosy, izay fanta-daza loatra eo amin’ny sehatry ny fanabeazana.

Fotoam-pivavahana lehibe notanterahina tetsy amin’ny fiangonana Fjkm Atsimon’i Mahamasina no nentina nisantarana izany, izay nisaorana sy nanomezam-boninahitra an’Andriamanitra. Raha ny fanadihadiana natao dia efa maherin’ny 100.000 ireo mpianatra nandalo teo anivon’ny vondrona CPE raha 400 ny isan’ireo mpampianatra. Hetsika maro loha no entina hanamarihana izany mandritra ity taom-pianarana vaovao ity toy ny fizarana mari-pankasitrahana ho an’ny mpanabe rehetra niasa teo anivon’ny vondrona CPE. Hisy ihany koa ny fananganana fotodrafitrasa lehibe sy vaovao handraisana ny mpianatra toy ny eny Anosibe, Itaosy, Andoharanofotsy ary Fianarantsoa izay haharitra dimy taona. Tsiahivina fa vonona hiditra ao anatin’ilay rafi-pampianarana vaovao (PSE) ihany koa ny vondrona CPE. Antom-pisiany, hoy Atoa Ratefiarivony Rado, tale jeneralin’ny vondrona ny hanampiana ny fanjakana amin’ireo zavatra tsy vitany. Tsiahivina fa hanangana lisea ihany koa ny vondrona CPE ato ho ato raha ao anatin’ny vinan’ny tompon’andraikitra ny hisian’ny oniversite CPE mihitsy, izay hitantana ny tanora hatrany amin’ny sehatry ny asa.

Pati