Fampianarana

Partagé sur :
• facebook

Vita omaly 14 desambra 2020 tao amin’ny Ministeran’ny Fanabeazam-Pirenena

Anosy ny sonia fifanaraham-piaraha-miasa eo amin’io Ministera io sy ny Ministeran’ny Tontolo iainana sy ny Fampandrosoana Lovain-jafy amina tetikasa mandritra ny 5 taona sy hanombohana ny fiaraha-miasa akaiky (accord cadre), ka nanao izany ny Minisitra Sahondrarimalala Marie Michelle andaniny, ary ny Minisitra Baomiavotse Vahinala Raharinirina ankilany. Hiara-hiasa akaiky amin’ny fanatrarana ilay vina « Madagasikara Rakotr’ala » sy ny vina faha-4 maha laharam-pahamehana ny fanabeazana maha olom-pirenena ny Ministeran’ny Tontolo iainana sy ny Fampandrosoana Lovain-jafy. Amin’ny alalan’ilay fandaharan’asa “mpianatra iray, hazo iray” na “un élève, un arbre” no hanatanterahana izany. Ireo mpianatra eny amin’ny ambaratonga fototra, faharoa ary lisea miankina sy tsy miankina amin’ny fanjakana no ho voakasik’izany mba hanabeazana ny ankizy ho tia miaro sy mikolokolo ny tontolo iainana, hoy ny fampitam-baovao. Tanjona ny hametraka fitondran-tena hahalala ny fampiasana ara-drariny sy ny fiarovana ny tontolo iainana eto Madagasikara. Tsy maintsy hampidirina anatin’ny fandaharam-pianarana eny anivon’ny sekoly rehetra ny fianarana mamboly hazo mba hahalasa banky mpamatsy hazo ny sekoly isan’ambaratongany, hoy ny Minisitry ny Fanabeazam-Pirenena. Hapetraka arak’izany ny fomba fiasa amin’ny fanaovana fanentanana ara-teknika sy ny fampianarana izany miaraka amin’ny CISCO sy ny fitaleavam-paritry ny Tontolo iainana (DREDD) manerana ny faritra 22. Efa misy tanin-jana-kazo maherin’ny 200 isa iarahan’ny CISCO sy ny DREDD eran’i Madagasikara nanomboka tamin’ny fidiran’ny mpianatra teo.

 Toky R

Tia Tanindrazana

Samia mijoro ho an'i Gasikara.