Fampianarana

Vatsim-pianarana mankany ivelany Firenena 4 no tena mahaliana ireo tanora Malagasy

Fampianarana
Sabotsy 10 Febroary 2018

Firenena efatra no mbola tena mahaliana ny tanora Malagasy hanohizana fianarana any ivelany ankehitriny dia i Canada, Autriche, Allemagne ary Etazonia, raha araka ny fanadihadiana natao.

Ho an’i Autriche manokana mantsy raha araka ny fanazavan’i Jacky Fanambinana, tompon’andraikitra voalohany eo anivon’ny Faneducation Agency dia mbola misy any an-toerana ny oniversitém-panjakana tsy handoavam-bola nefa tena tsara tokoa. Ankoatra izay dia ny lalam-piofanana informatika sy ny business administration no tena mahaliana ny mpianatra noho izy ireo mora ahitana asa. Mba ho fanampiana ireo tanora mpianatra Malagasy maniry ny hanohy ny fianarany any ivelany ary dia tanterahina etsy amin’ny hotel Louvre Antaninarenina nanomboka omaly ilay hetsika “ Education Global Expo” karakarain’izy ireo. Hifarana anio sabotsy izany ka ny tanjona dia ny mba hahafahana manampy sy manohana ireo tanora mpianatra amin’ny fikasany hivoaka any ivelany na amin’ny resaka fikarakarana taratasy izany eny hatramin’ny fitsenana azy eny amin’ny seranam-piaramanidina sy ny trano honenany. Tsiahivina moa fa efa nahatratra 50 isa ireo tanora Malagasy mpianatra nalefan’ny Faneducation Agency tany ivelany tamin’ny taona 2017 lasa teo.

Pati