Fampianarana

Tontolon’ny fampianarana Mety ajanona ny fampiharana ny PSE

Fampianarana
Alatsinainy 28 Janoary 2019

Mbola baraingo tanteraka ny firosoana mankany amin’ny fanatanterahana ilay rafi-panabeazana PSE eto amintsika.

Raha ny nambaran’ny minisitry ny fanabeazam-pirenena sy ny fampianarana teknika vaovao Rtoa Marie Therèse ny sabotsy teo mantsy dia mbola hakana ny hevitry ny maro ny fanatontosana azy io na tsia. Raha ny feo mandeha etsy sy eroa tokoa mantsy dia samy tsy mankasitraka ny fanatanterahana ity rafi-panabeazana PSE ity avokoa ny ankamaroan’ireo mpampianatra sy ny ray aman-dreny. Ho an’ireo eny anivon’ny sekoly tsy miankina manokana, ohatra, dia nambaran’izy ireo fa vao mainka hampitombo ny tahan’ireo ankizy tsy tafiditra an-tsekoly ny fanovana ny fidiran’ny mpianatra ho volana martsa satria mbola ao anatin’ny maitso ahitra tanteraka. Tsy hanam-bola velively hampidirana mpianatra sy hividianana fitaovana ny ray aman-dreny noho izany, hoy izy ireo. Ho an’ireo ray aman-dreny indray dia ilay fotoam-pialantsasatra lehibe tafiditra anaty fotoam-pahavaratra mihitsy no tena manahirana azy ireo satria hanano sarotra be ihany ny hitondra ankohonana haka rivo-dranomasina mandritra ny fotoana handalovan’ny rivodoza….Hiroso amin’ny fandinihana ireo rehetra ireo miaraka ny minisiteran’ny fanabeazam-pirenena, araka izany. Tontosa ny sabotsy teo moa ny famindram-pahefana teo amin’ny minisitra vaovao Rtoa Marie Therèse sy ny teo aloha Atoa Horace Gatien.

Pati