Fampianarana

Sendikan’ny mpampianatra malagasy Manohana ny hetsika ataon’ny depiote

Fampianarana
Alarobia 02 Mey 2018

« Hanova ny tantara ny SEMPAMA mba tsy iharany intsony ». Teny efa nolazain’ny SEMPAMA io, roa taona lasa izay ary mbola entiny hanohanana ny hetsika ataon’ny solombavambahoaka manoloana izao olana ara-politika misy eto Madagasikara izao.

Misy mpampianatra maro ao anatin’ny tolona atao, hoy ny solontenan’izy ireo ka inoana sy antenaina fa mba hisy fiantraikany amin’ny fahasahiranana sy fahantrana lalina mianjady amin’ny mpampianatra rehetra eto amin’ny firenena. Araka izany dia hiezaka handray an-tanana ny ho aviny ny fikambanan’ny mpampianatra mivondrona ao ami’ny SEMPAMA. Iaraha-mahalala fa ny mpampianatra mpanabe no maro an’isa indrindra amin’ny mpiasa manerana an’i Madagasikara. Ankoatr’izay dia miombina amin’ny sendika rehetra izy ireo amin’ny fitakiana ny karama mendrika sy sahaza. Nanome toky ireto farany fa hiezaka ny hanatsara ny vokatry ny fampianarana izay nikorosy fahana tanteraka nandritra ny folo taona farany. Eo ihany koa ny fampitomboana ny fahaiza-manaon’ny mpampianatra tsirairay mba hampandroso ny kalitaon’ny fampianarana, indrindra ny any ambanivohitra. Tsy tokony hiandrasana an’iza sy iza ity sehatra fampianarana ity fa antoky ny ho avin’i Madagasikara ka tsara raha mandray ny andraikitra tandrify azy ny tsirairay.

Tsiry