Fampianarana

Sekoly ambony ESPIC Niampy 40 mianadahy indray ireo teknisianina navoakany

Fampianarana
Alatsinainy 27 Novambra 2017

Nitombo isa indray ireo teknisianina ambony eto amintsika. Anisan’izany ireo 40 mianadahy vao navoakan’ny sekoly ambony ESPIC ( Ecole Supérieure Professionnelle en Informatique et Commerce) etsy 67 ha ny sabotsy lasa teo.

Ny 20 amin’ireo no notolorana ny mari-pahaizana Diplôme de tecchnicien Superieur na ny bacc+2, raha nahazo ny mari-pahaizana Bakalôrea professionnelle kosa ny 20 ambiny nianatra momba ny fitantanana, ny informatika, ny commerce ary ny droit. Nambaran’ny solontenan’ny minisiteran’ny fampianarana teknika sy ny fanofanana arak’asa fa tsy vitan’izy ireo irery ny fanampiana ny tanora Malagasy hiditra avy hatrany eo amin’ny sehatry ny asa tahaka izao fa tsy maintsy miara-miasa amin’ny sekoly tsy miankina izy ireo. Anisan’ireny ny sekoly ambony ESPIC izay hany sekoly afaka manome io mari-pahaizana Bakalôrea professionnelle io entina hanampiana ireo tanora tsy afaka manohy ny fianarany intsony noho ny antony maro. Nambaran’ny tale jeneraliny Atoa Miandrisoa Manantena fa efa miroso amin’ny fijerena manokana ireo ankizy madinika eto amintsika ihany koa izy ireo ankehitriny amin’ny alalan’ny fanokafana ny fikambanana Ankoay izay sady hampianatra azy ireny ho tia sy hankafy ny lalao baolina kitra no hampirisika azy mafy mba hilofo amin’ny fianarany ihany koa. Ny sabotsy teo no nanatanterahana ny lanonana mifandraika amin’izany teny Ivato.

Pati