Fampianarana

Sekoly ambony CNTEMAD Hiroso amin’ny fanofanana arak’asa ny mpianatra koa

Fampianarana
Zoma 21 Jona 2019

Mpianatry ny oniversitem-panjakana CNTEMAD miisa 16.800 no miatrika fanadinana, hifarana anio.

Misandraka amina distrika 46 ao anatin’ny faritra maromaro izy ireo raha miisa 46 ihany koa ireo foibem-panadinana mandray azy. Tonga nitsidika ny foibem-panadinana LMA Ampefiloha sy JJ Rabearivelo etsy Analakely tamin’ny Alatsinainy teo ny tale nasionaly vaovaon’ny CNTEMAD Atoa Jean Jacques Rakotoarison, notronin’ny talen’ny kabinetran’ny minisiteran’ny fampianarana ambaratonga ambony sy ny sekretera jeneraly. Nivoitra nandritra izany fa anisan’ny fanambin’ny fitondram-panjakana ankehitriny ny hampangarahara tanteraka ny fanadinana tanterahin’ireo mpianatry ny CNTEMAD. Misy officier de police judiciare mihitsy mantsy manara-maso sy mametraka tombokase amin’ny taratasim-panadinan’ireo mpianatra mialoha ny hanaterana azy any amin’ny CNTEMAD. Tsiahivina moa fa efa tamin’ny taona 1992 no nijoro ny CNTEMAD. Mpianatra maro no efa navoakany ary amin’izao manaraka izao dia hisy ihany koa ny fanofanana arak’asa ny tanora hahafahana miady amin’ny fahantrana.

Pati