Fampianarana

Sehatra fanabeazana Mila arahi-maso akaiky

Fampianarana
Alatsinainy 13 Janoary 2020

Ny sehatra fampianarana no kitro ifaharan’ny fampandrosoana. Rehefa miakatra ny fari-pahaizan’ny olona dia tokony hiakatra manaraka izay ihany koa ny faripananany.

Tsy mahatratra 3% akory ny Malagasy mianatra eny amin’ny ambaratonga ambony raha toa ka mihoatra ny 70% ny ankamaroan’ireo firenena mandroso. Raha ny eto Madagasikara dia zara raha nandalo fanabeazana fototra ny ankamaroan’ny Malagasy. Manoloana izany rehetra izany dia ilaina ny ezaka hampandrosoana ny sehatra fanabeazana, hoy ny Tale jeneralin’ny ESTIIM (Engineering School of Tourism, Informatics, Interpretership and Management), Atoa Andrianadison. Eo amin’ny lafiny fampianarana ambony dia mampametra-panontaniana mihitsy ny zava-misy amin’izao fotoana izao satria maro be ireo oniversite tsy miankina mampanantena zavatra amin’ny mpianatra. Anisan’izany hoy izy ny filazan’ny sasany fa 2 taona dia afaka mahazo ny mari-pahaizana license, na 3 taona dia afaka mahazo ny diploma Master. Izany zavatra izany anefa dia tsy mitombina mihitsy ary hanimba sy hamitaka ny mpianatra indrindra amin’ny tontolon’ny asa. Tokony hojeren’ny tompon’andraikitra faran’izay haingana izany, hoy ny Talen’ny ESTIIM nandritra ny famoahana ny mpianatra andiany FANAJA tetsy amin’ny Centre de Conférence International tamin’ny sabotsy lasa teo. Tsiahivina fa misy lalam-piofanana 6 ny ao amin’ny ESTIIM ka anisan’izany ny fitantanana, ny varotra, ny fizahantany, ny informatika, ny lalàna ary ny diplomasia.

Tsirinasolo