Fampianarana

Partagé sur :
• facebook

Ny birao nasionaly sy ireo biraon’ny sampana SECES manerana ny nosy izay nanatanteraka fivoriana ampitain-davitra omaly 6 oktobra 2022

dia mahatsapa fa fanesoana sy fandranitana anay mpampianatra mpikaroka sy mpikaroka mpampianatra mivondrona ato anatin’ny SECES ny filazan’ny mpitondra fa anisan’ny atao laharam-pahamehana ny fampianarana ambaratonga ambony sy ny fikarohana ara-tsiansa, manoloana ny fampitam- baovaon’ny filankevitry ny minisitra, ny datin’ny 28 septambra 2022 lasa teo izay milaza fa « 200 postes budgétaires » fotsiny ihany no mba nomena ny MESupReS, hoy ny fanambaran’izy ireo. Mahita ny tsy fahita izahay mpampianatra mpikaroka sy mpikaroka mpampianatra tato anatin’ny 2 taona izay satria zary lasa ankilabao tanteraka sy voahosihosy ny zo sy hasin’ny mpampianatra mpikaroka sy mpikaroka mpampianatra, ny fampianarana ambony sy ny fikarohana ara-tsiansa. Noho izany dia tsy hamoaka valim-panadinana taom-pianarana 2021-2022 no sady tsy hiroso velively amin’ny fidirana 2022-2023 ny mpampianatra mpikaroka sy mpikaroka mpampianatra mivondrona ao amin’ny SECES raha tsy voaloan’ny fitondram-panjakana mialohan’ny daty efa voatondron’ny CPU na “Conférence des Présidents des Universités” farany teo ny ora fanampiny na «Heures Complémentaires », ny « vacations », « indemnités de recherches » ho an’ny « retraités chercheurs », « rappels sur les 3 décrets » sy ny hafa rehetra. Mitaky ny mangarahara tanteraka sy mifanaraka amin’ny didy aman-dalàna manan-kery eto amin’ny tany sy ny firenena, eo amin’ny fandraisana ho mpiasam-panjakana an’ireo mpampianatra mpikaroka sy mpikaroka mpampianatra ny SECES. Tena tsy mifanaraka velively no sady ambany lavitra noho ny isan’ireo mpampianatra mpikaroka sy mpikaroka mpampianatra efa lasa nisotro ronono sy ireo nodimandry ny « 200 postes budgétaires » nomen’ny fitondram-panjakana ny MESupReS. Mitaky fijerena manokana ny fampitomboana ny « postes budgétaires » ho an’ny fampianarana ambony sy ny fikarohana ara- tsiansa mba ho tena mifanaraka amin’ny zava-misy marina tokoa no sady hifanahantsahana amin’ny an’ireo minisitera hafa. Tsy ekenay ny fibodoana an-keriny sady tsy ara-dalàna ny tanin’ny oniversite miankina amin’ny fanjakana sy ireo foibem-pikarohana nasionaly ary miantso fandraisana andraikitra hentitra avy amin’ny mpitondra fanjakana sy ny minisitera rehetra voakasikin’izany, indrindra, fa ireo minisitera mivondrona ao anatin’ny kaomisionina momba ny tanin’ny oniversite miankina amin’ny fanjakana sy ireo foibem-pikarohana nasionaly, hoy hatrany ity sendika ity.

J. Mirija

Tia Tanindrazana

Samia mijoro ho an'i Gasikara.