Fampianarana

« SALON DE L’ETUDIANT » Hifarana anio etsy Mahamasina

Fampianarana
Zoma 23 Febroary 2018

Hifarana anio etsy amin’ny lapan’ny kolontsaina sy ny fanatanjahantena etsy Mahamasina rehefa naharitra roa andro ilay “Salon de l’étudiant” natokana ho an’ny volana Febroary, karakarain’ny Madajeune.

Sekoly ambaratonga ambony manodidina ny 27 isa no mandray anjara amin’izany, ahitana ireo lalam-piofanana rehetra hahafahan’ny tanora mahita asa haingana ka anisan’ireny ny fanofanana ho mpampivelona sy ny mpitsabo mpanampy… Raha araka ny fanazavan’Atoa Lahatra Andriamahatsangy, tompon’andraikitra voalohany eo anivon’ny Madajeune dia anisan’ny tanjon’izy ireo ny hanohana sy hanampy ireo tanora vao afa-panadinana Bakalôrea eto amintsika. Tafiditra ao anatin’izany ny fanoroana hevitra azy ireny ny mikasika ny lalam-piofanana tokony arahiny manoloana ny asa tiany hatao rehefa any aoriana raha eo ihany koa ny mba hahafahana manolo-tanana ireo ankizy nanao fifaninana teny amin’ny anjerimanontolo saingy nanao ny tsy ambinina. Manodidina ny 3.000 isa eo ho eo moa ireo mpianatra andrasana hitsidika ity Salon karakarain’ny Madajeune etsy Mahamasina ity.

Pati