Fampianarana

Partagé sur :
• facebook

Notokanana tamim-pomba ôfisialy ny alakamisy teo ireo, ny efitrano vaovaon’ny sekoly masindahy Jean Baptiste de la salle Imerinafovoany, rehefa avy nohavaozina.

Tao anatin’ny 4 volana, nanomboka tamin’ny volana aogositra, no nanamboarana ny foto-drafitr’asa rehetra. Niara-nisalahy tamin’ny fanombohana ny asa sy ity fitokanana ity ireo  herivelon’ny fiangonana NDA Imerinafovoany : ny pretra tompom-paritany sy ny filan-kevitra pastôraly, ary ny avy amin’ny sekoly dia ny maintimolaly, ny mpampianatra ary ireo ray aman-drenin’ny mpianatra. Efitra 8, amin’ny ilany avaratra atsinanan’ny sekoly, ireto notokanana ireto. Raha tsiahivina dia efa 66 taona no tsy nohavaozina mihitsy io ampahan’ny trano io. Efa nanomboka loa sy boboka ny korodona no sady mitete ihany koa ny valitafo, rehefa fahavaratra. Taorian’ity fanavaozana ity dia sady nihamalalaka ny tokontany no nihalehibe kokoa ireo efitrano ianaran’ireo kilasy ao amin’ny taona faha-10, ny kilasy faha-5 ary ny garabola. “Ny ilany atsimo atsinanan’ny sekoly indray izao no tetikasa manaraka irian’ny sekoly havaozina. Eo am-pamolavolana ny fangatahana fanampiana izahay”, hoy ny talen-tsekoly, Pierre Rakotoarisoa. Nisaoran’ny sekoly manokana moa ny angady nanampy tamin’ity fanavaozana ity, dia ny fikambanana “Manos Unidas”, fikambanana iraisam-pirenena, manampy manokana ny sekoly eto Madagasikara. Mpianatra manodidina ny 1240 moa no mandranto fianarana ao amin’ny sekoly Saint Jean Baptiste de la sale ankehitriny.

Aina

Tia Tanindrazana

Samia mijoro ho an'i Gasikara.