Fampianarana

Pr Radanoara Julien Mandrisika ny tanora hifaninana

Fampianarana
Zoma 01 Septambra 2017

Ny 20.000 amin’ireo 75.000 mahery afa-panadinana bakalorea ihany no azon’ny oniversitem-panjakana raisina ho an’ny eto Antananarivo.

Efa nanazava izany rahateo ny minisitry ny fampianarana ambony Rasoazananiera Marie Monique, ary naneho fa ny fampanarahana fenitra ireo oniversite tsy miankina sy ireo fampianarana ampitain-davitra no hitadiavana hevitra. Raha izaho ny eo amin’ny toeran’ny mpianatra, dia manao fifaninanana hidirana ho mpiasam-panjakana aho, hoy ny Pr Radanoara Julien. Afaka sady miasa no misondrotra hatrany amin’ny alalan’ny fifaninanana hiakarana amin’ny asa, raha ny fanazavany. Amin’izao ihany koa dia efa mitombo ny fianarana ampitain-davitra, izay hahazoana mari-pahaizana mitovy amin’ny eny Ankatso, ka sady afaka mianatra no miatrika ny fiainana, raha ny fanehoan-kevitra nataon’ity mpampianatra amina ambaratonga ambony ity hatrany. Tsy natao hanakiviana, fa maro amin’ireo tanora no lany andro teny amin’ny oniversite fotsiny amin’izao fotoana, ka midonanam-poana vokatry ny tsy fananan’asa, kanefa mety efa nahavita zavatra maro raha sady nitady vahaolana hafa no nianatra.

Toky R