Fampianarana

Oniversiten’Antananarivo Hiara-kiasa amin’ny oniversiten’i Kyoto any Japon

Fampianarana
Alakamisy 22 Aogositra 2019

Hiara-kiasa akaiky manomboka izao ny oniversiten’Antananarivo sy ny oniversiten’i Kyoto any Japon.

Amin’ny alalan’ny fikarohana ireo zava-maniry maro mampiavaka antsika eto Madagasikara hahafahana mamokatra fanafody no hiarahan’ny roa tonta miasa ho fitsinjovana ny fahasalamam-bahoaka. Fa ankoatra izay dia hiara-kiasa amin’ny fifanakalozana mpampianatra ihany koa ny roa tonta. Hisy, ohatra, ireo mpampianatra be traikefa avy any Japon ho avy eto Madagasikara ary hizara ny traikefany amin’ireo mpampianatra namany eny anivon’ny anjerimanontolo sy ny mpianatra, arahin’ny fampianarana teny vahiny ireto farany. Nomarihin’ny profesora Mamy Ravelomanana, filohan’ny oniversiten’Antananarivo tamin’izany fa tombontsoa maro no aterak’izao fiaraha-miasa eo amin’ny roa tonta izao. Tontosa omaly ny sonia fifanekem-piaraha-miasa teo amin’izy ireo ary hanomboka tsy ho ela ny asa. Tsiahivina moa fa anisan’ny oniversite lehibe indrindra any Japon ny an’i Kyoto.

Pati