Fampianarana

Oniversiten'i Mahajanga Nitsefotra ny fifampidinihana

Fampianarana
Alakamisy 01 Febroary 2018

Tsy nahomby ny fampifanatonana mivantana ny tompon' andraikitry ny oniversite sy ny mpianatra nataon'ireo solontenam-panjakana tao Mahajanga notarihin'ny Préfet Ravelomahay Lahiniaina Fitiavana sy ireo lehiben'ny OMC omaly maraina, nokasaina hamahana ny olan’ny oniversiten'i Mahajanga.

Tao amin'ny Grand-Amphi Ambondrona no ambohimpihaonana. Nandritra izany no namakiana ny fehinkevitra tapaka nandritra ny fivoriana savaranonando natao tao amin'ny Lapan'ny tanàna ny talata tolakandro teo. Voarakitra ao anatin'io fehinkevitra io fa ny volana aprily 2018 vao miverina mipetraka amin'ny trano ny mpianatra, foanana ny fikambanan'ny mpianatra na ny CCE (Conseil Consultatif des Étudiants) na ny BDEUM (Bureau des Étudiants de l'Université de Mahajanga), tsy misy miova ny fanapahan-kevitry ny CODIS ny amin'ireo sazy rehetra ary misokatra ny fifampiresahana. Taorian'ny namakiana io fehinkevitra io dia horakoraka tsy nifandrenesana maneho fandavana no nasetrin'ireo mpianatra nanerana ny efitrano nivoriana ka nivoaka avokoa ireo mpampianatra sy tompon’andraikitry ny oniversite. Ireo solontenam-panjakana sisa no nifandahatra sy nifandimby nandray fitenenana ary nifampihaino teo. Taorian'io dia mbola nisy ny fifampidinihana tsy nahazo natrehina teny amin'ny biraon'ny KAKAL teny Mahajanga be.

Vahaniaina