Fampianarana

Partagé sur :
• facebook

Nanapa-kevitra ny hampiato ny fampianarana eny amin’ny oniversite ny sendikan’ny mpampianatra-mpikaroka sy ny mpikaroka-mpampianatra na ny SECES taorian’ny 72 ora nomen’izy ireo ny fanjakana, izay tapitra omaly.

 Tsy nahafa-po sy tsy nahitam-bokany ny fifampidinihana niarahana tamin’ny minisiteran’ny fampianarana ambony. Taorian’ny fivoriana nataon’izy ireo omaly dia nambaran’ny SECES fa mitsahatra ny asa fampianarana sy ny asa fikarohana manerana ny toeram-pianarana eto amin’ny Oniversiten’Antananarivo sy ny any amin’ireo foibem-pikarohana nasionaly rehetra mandra-pisian’ny vahaolana. Miantso filankevitra nasionaly tsy ara-potoana ny tompon’andraikitra isan-tsokajiny ao anatin’ny SECES ny 1-2 jona izao mba handraisana fanapahan-kevitra hentitra manoloana ny dingana efa natao sy ny mety ho fitadiavam-bahaolana. Aorian’io no mety hanaovana fitokonana faobe raha toa ka tsy misy ny vahaolana mafonja avy amin’ny fanjakana dia fanomezana ny zon’izy ireo. Vahaolana naroson’ny minisitera sy ny governemanta ny fiandrasana ny volavolan-dalàna mifehy ny tetibolam-panjakana 2018 izay mifanipaka tanteraka tamin’ny fifanarahana natao teny Mahazoarivo ny 10 septambra 2015. Nandritra ny “loi de finance initial 2017” no tokony hanomezana ireo zo sy tombontsoan’ny mpampianatra mpikaroka dia   ny “indemnité de logement” sy “indemnité de résidence”, hoy ny SECES. Tsy fitakiana vaovao, araka izany, ny an’ny SECES fa fanatanterahana ny fifanarahana efa nisy saingy arirariran’ny fanjakana. Miato aloha izany ny fampianarana eny amin’ny anjerimanontolo raha tsy tanteraka ny fitakian’ny mpampianatra. Mbola baraingo tanteraka ny hitohizan’ny fampianarana. Andrasana kosa izay ho fihetsiky ny mpianatra.

Toky R

Tia Tanindrazana

Samia mijoro ho an'i Gasikara.